कुनै पनि बुवाआमाको लागि आफ्नो सन्तानको जन्म हुनु सायद उनीहरुको जीवनको सबैभन्दा खुसीको पल हो । कतिपय दम्पतीहरु जुम्ल्याहा सन्तान जन्माउन र हुर्काउन रुचाउँछन् । जुम्याहा भन्ने बित्तिकै एउटै गर्भबाट एकैपटकमा जन्मिएका दुई बच्चा भन्ने बुझिन्छ । तर हालै एउटा यस्ता जुम्ल्याहा बच्चा जन्मिएका छन् जसको जन्ममितिमा एक वर्षको फरक छ ।
अमेरिकाको टेक्सास सहरमा यो अनौठो घटना भएको छ । मिडिया रिपोर्ट अनुसार केली नामकी महिलाले ती जुम्ल्याहा बच्चा जन्माएकी हुन् एक वर्षको अन्तरमा । यो कसरी सम्भव भयो त ?
वास्तवमा केलीले गत सन् २०२२ को अन्तिम दिन अर्थात् डिसेम्बर ३१ को रात बच्चा जन्माइन् । उनको गर्भमा रहेका जुम्ल्याहामध्ये पहिलो बच्चाको जन्म रातको ११ बजेर ५५ मिनेटमा भयो । दोस्रो बच्चा जन्मिनका लागि भने केहीबेर लाग्यो । त्यसो हुँदा उनको पेटमा रहेको दोस्रो जुम्ल्याहा जन्मिसक्दा सन् २०२३ लागिसकेको थियो । अर्थात् उनले सन् २०२३ को जनवरी १ को मध्यरात १२ बजेर १ मिनेटमा जुम्ल्याहामध्येको दोस्रो बच्चा जन्माइन् ।
वास्तवमा ती जुम्ल्याहाको जन्म केही मिनेटको अन्तरमा भयो । तर त्यो एक वर्षको फरक हुनपुग्यो । पहिलो बच्चा सन् २०२२ र दोस्रो बच्चा सन् २०२३ मा जन्मियो ।
केलीले आफ्नो फेसबुक पेजमा पति क्लिफ र आफूलाई आन्नी जो र इफी रोज स्कट नामका जुम्ल्याहा सन्तान प्राप्त भएको उल्लेख गर्दै आफू, बच्चा र पतिका तस्वीर समेत सेयर गरेकी छिन् ।
एजेन्सीको सहयोगमा
