नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले अर्थमन्त्री जनार्दन शर्मालाई हटाएर अर्को ठूलो सरप्राइज दिने तयारी गरेका छन् ।
प्रचण्डले पार्टी महासचिवको दाबेदार अर्थमन्त्रीसमेत रहेका नेता जनार्दन शर्मा विवादमा तानिएको र सत्तारुढ दलबाटै राजीनामा मागिएकोले पद जोगिने सम्भावना न्यून रहेकाले उनलाई हटाएर महासचिव बनाउने तयारी गरेका स्रोतले बताएको हो ।
दाहालले प्रधानमन्त्री शेरबहादुर देउवासँग अर्थमन्त्री शर्माको निरन्तरताको लागि आग्रह गरेका छन् । र, प्रधानमन्त्री देउवा पनि दाहालको आग्रहमा सकारात्मक भएपनि चौतर्फी प्रश्न उठेपछि बाध्यात्मक अवस्था आएको भन्दै हटाउने तयारीमा लागेका छन् ।
दाहालले यदि शर्मा अर्थमन्त्रीबाट हट्नुपर्ने अवस्था आए उनको ठाउँमा वर्षमान पुनलाई नियुक्त गर्ने र शर्मालाई पार्टीको महासचिव बनाउनेगरि मुभ गरेका छन् । माओवादीमा अहिले संगठनलाई चलाउनसक्ने नेताको रुपमा पुन र शर्मा नै देखिएका छन् ।
दाहाललाई यी दुईमध्ये एक छान्नपनि सकस नै छ । यही सकसको कारण नै महाधिवेशन भएको यतिका महिना बित्दा समेत पदाधिकारी चयन हुन नसकेको कतिपय नेताले आरोप लगाउँदै आएका छन् ।
