कैलालीको जानकी गाउँपालिका–९ घर भएका २५ वर्षीय अर्जुन दासलाई मोवाइल चोरेको निहुँमा हत्या गरेको प्रहरीले जनाएको छ । हत्यामा संलग्न मध्येका ४ जनालाई महानगरीय अपराध महाशाखाले रुपन्देहीको बेलहियाबाट पक्राउ गरेको छ । जिल्ला प्रहरी कार्यालय कैलालीले यसअघि जानकी गाउँपालिका घर भएका कमल साउदलाई पक्राउ गरेको थियो ।
कैलाली जिल्ला अदालतको आदेशले साउद पुर्पक्षका लागि थुनामा छन् । महाशाखाले जानकी गाउँपालिका– ९ घर भएका १९ वर्षका मनोज भण्डारी, १९ वर्षका सुमित साउद, बमबहादुर बोहोरा उर्फ बमे, र रोनी परियारउर्फ दिलिप दासलाई पक्रेर सार्वजनिक गरेको छ । अर्जुन दास गाउँमै मजदुरी गर्थे । २०७८ पुस ३ मा टाउको काटेर छुट्याएको अवस्थामा स्थानीय अमरावती सामुदायिक वनमा अर्जुनको शव भेटिएको थियो ।
हत्याभन्दा ३ दिनअघि कमल साउदको मोवाइल हरायो । मोवाइल हराउनुमा कमलले १९ वर्षका सुमित साउदलाई शंका गरे । ‘चोर’ आरोप लगाएर कुटे । सुमितलाई पिटेको रिसमा मनोज भण्डारी र बमबहादुर बोहोराले कमलको २५ हजार बराबरको नाइट्रोभेट–१० चोरेर जंगलमा लुकाए ।
मृतक अर्जुन दासले मोवाइल चोरेर हर्के भाटलाई दिएको कुरा सुमित साउदले पत्ता लगाए । त्यसपछि सो मोवाइल कमल साउदलाई फिर्ता गरेको महानगरीय अपराध महाशाखाका एसपी कृष्णप्रसाद कोइरालाले बताए ।
मोवाइल चोरी र सुमितमाथि भएको कुटपिटको मुख्य दोषी सबैले अर्जुन दासलाई नै किटान गरेर उनलाई कुट्ने योजना बनाए । प्रहरीका अनुसार मनोज भण्डारी, सुमित साउद, बमबहादुर बोहोरा, सुशील मयाल, दिलिप दास, बादल बिक र करण दर्नाल मिलेर अर्जुनलाई कुट्ने योजना बनाएका थिए ।
पुस २ मा साँझ ६ बजे अर्जुनसहित ११ जना सामुदायिक वनमा लागुऔषध सेवन गर्नका लागि जम्मा हुन्छन् । सबैले लागु औषध खान्छन् । १० जना मिलेर अर्जुनलाई दोषी देखाई कुट्छन् र साजको रुखमा हातखुट्टा बाँधेर राख्छन् । करिब ४–५ घण्टा रुखमा बाँधेपछि हत्या योजनाअनुसार सुशील मयालले खुकुरी ल्याउँछन् ।
हातखुट्टा बाँधेर खुकुरी प्रयोग गरेर घाँटी छिनालेपछि फेरि उनीहरुले लागुऔषध सेवन गरेको अनुसन्धानबाट थाहा भएको एसपी कोइरालाले बताए । रातभर घटनास्थलमा नै बसेर पुस ३ मा ६ जना भारतको दिल्लीतिर भागेका थिए । हत्यामा संलग्न मध्येका कनकलाल विक, करण दर्नाल, सुशील मयाल र सुशीलका साथी (नाम नखुलेका) कैलालीमै बसेका थिए । महाशाखाले भारतबाट काम खोज्न रुपन्देही आएका बेला ४ जनालाई बेलहियाबाट पक्राउ गरिएको जानकारी दिएको छ । हत्यामा संलग्न ५ जना आरोपी अझै फरार छन् ।
