काठमाडौं । विश्वकै सबैभन्दा ठूलो फुटबल प्रतियोगिता फिफा विश्वकप २०२६ आगामी ११ जुनदेखि १९ जुलाई २०२६ सम्म आयोजना हुँदैछ । यसपटकको विश्वकप इतिहासकै सबैभन्दा ठूलो संस्करणका रूपमा आउँदैछ, जहाँ पहिलो पटक ४८ राष्ट्रले सहभागिता जनाउनेछन् ।
फिफाले यस संस्करणमा प्रतियोगिताको स्वरूप परिवर्तन गर्दै टोली संख्या ३२ बाट बढाएर ४८ पुर्याएको हो । प्रतियोगिता संयुक्त राज्य अमेरिका (USA), मेक्सिको र क्यानडा गरी तीन देशले संयुक्त रूपमा आयोजना गर्दैछन् ।
नयाँ ढाँचाअनुसार विश्वकपमा १२ समूह (A–L) रहनेछन् । प्रत्येक समूहमा ४ टोली रहने व्यवस्था गरिएको छ। समूह चरणमा प्रत्येक टोलीले तीन–तीन खेल खेल्नेछ। समूहका शीर्ष दुई टोलीसँगै उत्कृष्ट प्रदर्शन गर्ने ८ वटा तेस्रो स्थानका टोली नकआउट चरणमा प्रवेश गर्नेछन् ।
यस संस्करणमा कुल १०४ खेल सञ्चालन हुनेछन् । जसमध्ये ७८ खेल अमेरिका, १३ खेल मेक्सिको र १३ खेल क्यानडामा खेलाइने तालिका छ ।
विश्वकपको उद्घाटन खेल ११ जुन २०२६ मा मेक्सिको सिटीस्थित ऐतिहासिक Estadio Azteca रंगशालामा हुनेछ। यस्तै, फाइनल खेल १९ जुलाई २०२६ मा अमेरिकाको न्यूयोर्क/न्युजर्सीस्थित MetLife Stadium मा आयोजना गरिने तय भएको छ ।
प्रतियोगिताको समूह चरण ११ जुनदेखि २७ जुनसम्म, त्यसपछि राउन्ड अफ ३२, राउन्ड अफ १६, क्वाटरफाइनल, सेमिफाइनल हुँदै १९ जुलाईमा फाइनल खेलसँग प्रतियोगिता सम्पन्न हुनेछ ।
विश्वकपका खेलहरू अमेरिका, मेक्सिको र क्यानडाका विभिन्न समय क्षेत्र (Time Zones) मा हुने भएकाले नेपाल समयअनुसार बिहान, साँझ, राति तथा मध्यरातसम्म खेल हेर्न पाइने सम्भावना रहेको छ ।
यसपटकको विश्वकपले नयाँ ढाँचा, बढी खेल, बढी टोली र तीन राष्ट्रको संयुक्त आयोजनाका कारण विश्व फुटबलमा नयाँ इतिहास रच्ने अपेक्षा गरिएको छ ।
(नोटः अन्तिम समूह विभाजन तथा सबै सहभागी राष्ट्रहरूको पूर्ण सूची छनोट प्रक्रिया सम्पन्न भएपछि फिफाले सार्वजनिक गर्नेछ ।)
