उदीयमान स्ट्राइकरका रूपमा हेरिएका जिलेस्पीजंग कार्कीको गोल निर्णायक बनेपछि नेपालले अन्तर्राष्ट्रिय मैत्रीपूर्ण फुटबलमा सिंगापुरमाथि ऐतिहासिक जित निकालेको छ ।
सिंगापुर राष्ट्रिय रंगशालामा नेपालले शुक्रबार घरेलु टोली सिंगापुरमाथि १–० को साँघुरो जित निकाल्यो । नेपालले आफूभन्दा १५औं स्थान माथिको सिंगापुरलाई हराउन सफल भएको हो । एएफसी एसियन कप छनोटको अभ्यासस्वरूप नेपालले सिंगापुरसँग मैत्रीपूर्ण फुटबल खेल्दा सुखद सुरुआत गरेको छ । साथै नवनियुक्त मुख्य प्रशिक्षक म्याट रस पनि आफ्नो पहिलो खेलमा नै नेपाललाई जित दिलाउन सफल भएका छन् । उनको प्रशिक्षणमा नेपालले पहिलोपल्ट सिंगापुरलाई हराउँदै इतिहास पनि रचेको छ ।
जिलेस्पीजंगले १२औं मिनेटमा गोल गर्दै अग्रता दिलाएका थिए । मनिष डाँगीले राइट साइडबाट दिएको क्रसलाई जिलेस्पीले वान टचमार्फत सुन्दर गोल गरेका हुन् । यससँगै जिलेस्पीले नेपालको जर्सीमा तेस्रो गोल पूरा गरे । त्यो गोलपछि नेपालका प्रशिक्षक रसले डिफेन्सिभ रणनीति अपनाएका थिए । जुन सफल हुँदा नेपालले अग्रता जोगाउँदै जित निकाल्यो । सिंगापुरले केही चुनौती प्रस्तुत गरे पनि नेपालका कप्तान तथा गोलकिपर किरणकुमार लिम्बूले असफल बनाए । प्रशिक्षक रसले सुमन श्रेष्ठ र सुवास बम ठकुरीलाई डेब्यु गराएका थिए ।
