चितवन। चितवनमा निउरो टिप्न गएकी एक महिलाको खोलाले बगाएर मृत्यु भएको छ ।
मृत्यु हुनेमा रत्ननगर नगरपालिका १४ माधवपुर घर भई हाल खैरहनी नगरपालिका १ साहीचोक बस्ने ३४ वर्षीया कल्पना श्रेष्ठ रिजाल रहेकी छन् । आज (मंगलबार) दिउँसो ३:१५ बजे खैरहनी ६ तुलसीपुरस्थित लदरी खोलामा निउरो टिप्न जाने क्रममा उनलाई खोलाले बगाएको थियो ।
डिलबाट चिपिएर लडेपछि उनलाई खोलाले बगाएको जिल्ला प्रहरी कार्यालय चितवनले जानकारी दिएको छ । ईलाका प्रहरी कार्यालय खैरहनीबाट प्रहरी निरीक्षकको कमाण्डमा खटिएको १५ जनाको उद्धार टोलीले ३:४५ बजे उनको शव फेला पारेको थियो । शव घटनास्थलबाट १० मिटर तल फेला परेको प्रहरीले जनाएको छ ।
