सेन्ट्रल कलेज अफ भोकेसनल ट्रेनिङ प्रा लि सँगको सहकार्यमा रुपान्तरण र युवा प्रा लि द्धारा लागू पदार्थ दुर्व्यसनीविरुद्ध ४० दिने अभियान सुरु गर्ने भएको छ । दुर्व्यसनी विरुद्धको सचेतना मुलक अभियान गरिने जेठ २३ गते सोमवार नारायणगढमा आयोजित पत्रकार सम्मेलन मार्फत अभियान एक साता भित्रै चितवन, नवलपुर र तनहुँका ४० विद्यालयमा सन्चालन गरिने संस्थाका अध्यक्ष ईश्वर गैरेले बताएका छन् ।
कक्षा ८ देखि माध्यमिक तहमा अध्ययनरत विद्यार्थीहरुलाई लक्षित गरेर कार्यक्रम गर्न लागिएको उनले बताए । विद्यार्थीहरु नै बढी मात्रामा लागू पदार्थ दुर्व्यसनीमा फस्ने जोखिम हुने भएकोले उनीहरुलाई नै लक्षित गरेर कार्यक्रम गर्न लागिएको उनको भनाइ छ विद्यालय उमेरदेखि नै लागू पदार्थ दुर्व्यसनीमा फस्ने र यही समूह नै दुर्व्यसनीको संजाल बनिरहेको हुँदा उनीहरुलाई नै लक्षित गरेको उनी वताउछन् ।
प्रत्येक विद्यालयमा विद्यार्थीलाई दुई घण्टा लागू पदार्थ दुर्व्यसनी र यसले निम्त्याउने घटनाक्रम वारे सचेत गराइने छ । ‘एउटा विद्यालयमा दुई घण्टा कार्यक्रम गरिने र प्रयोगकर्ताहरुको अनुभव सुनाई लागू पदार्थ दुर्व्यसनीमा फस्दा कति पीडादायी हुन्छ र यसले जीवन कसरी वर्वाद पार्छ भनेर प्रयोगकर्ताहरुको अनुभवलाई समट्दै तयार पारिएको भिडियो सामाग्रीको माध्यमबाट सचेत गराउने उनी वताउछन् ।
