युक्रेन युद्धको तीन महिना, सुस्त गतिमा भए पनि लक्ष्यतर्फ बढ्दै रुस

Share on facebook
Share on twitter
Share on linkedin
Share on pinterest

युक्रेनमाथि आक्रमणको तीन महिना पुग्दा रुसी सेना र डोनेत्सक तथा लुगान्स्कका सुरक्षाबलहरू युक्रेनका विभिन्न स्थानमा सैन्य कारवाही चलाइरहेका छन् ।

लिमान शहर नजिकको क्षेत्रलाई सुरक्षित बनाएपछि रुसी सैन्य इकाइहरूले उक्त शहरमा आक्रमण गरेका छन् । युक्रेनी सेनाको पोजिसनमा व्यापक आर्टिलरी आक्रमणपछि रुसी सैनिकहरू लिमानमा उत्तरपूर्वी दिशाबाट पसेका हुन् ।

मंगलवारसम्म लिमानको अधिकांश भाग रुसीहरूको नियन्त्रणमा पुगेको छ । युक्रेनी इकाइहरूले दक्षिणपश्चिममा रहेका बाहिरी भागमा पोजिसन लिएका छन् ।

त्यस्तै रुसी सैनिकहरू पोपास्नायाबाट विभिन्न दिशामा अघि बढिरहेका छन् ।

आक्रमणकारी इकाइहरू बाखमुततर्फ अघि बढिरहेका छन् । पिलिपचातिनो नामक स्थानमा भिडन्त भइरहेको छ ।

रुसी बलहरू जोलोतोए शहरमा पनि प्रवेश गरेका छन् । युक्रेनी इकाइहरूलाई किल्ला बनाएको ठाउँ र कमान्ड पोस्टबाट हटाइएको छ । दक्षिणी भागमा भिडन्त जारी छ ।

पोपास्नायाभन्दा उत्तरपश्चिममा रहेको भासिलेव्कामा पनि लडाइँ भइरहेको छ ।

बाखमुत र लिसिचान्स्कको बीचमा रहेको राजमार्ग रुसी बलहरूको गोलीबारीको निशाना बनेको छ । फलस्वरूप, सेभेरोडोनेत्स्क र लिसिचान्स्कमा रहेका युक्रेनी सैनिकहरूलाई सैन्य सामग्रीको आपूर्ति गर्न सकिएको छैन ।

सेभेरोडोनेत्स्कमा सडकमा लडाइँ चलिरहेको छ । घेराबन्दीको जोखिम भए पनि युक्रेनी सेनाको कमान्डले शहरभित्र अतिरिक्त सैनिकको तैनाथी गरेको छ । टेरिटोरियल डिफेन्स फर्मेसनका कम्तीका दुईवटा बटालियनलाई युद्धभूमिमा पठाइएको छ ।

डोनेत्स्कमा रुसी सेना र डोनेत्स्क मिलिसियाहरू स्वेत्लोदार्स्क क्षेत्रमा अघि बढिरहेका छन् । सोमवार उनीहरूले लुगान्स्कोए र मिरोनोव्स्की गाउँ नियन्त्रणमा लिएका थिए ।

मंगलवार रुसी झण्डा स्वेत्लोदार्स्कको प्रशासनिक भवनमा फहराइएको थियो । युक्रेनी सैनिकहरू उत्तरतर्फ पछि हटे । रुसीहरूलाई रोक्नका लागि युक्रेनी सैन्य इन्जिनीयरहरूले एउटा पुल उडाइदिए । त्यस्तै उनीहरूले उग्लेगोर्स्क रिजर्भोआरको बाँध भत्काउन विफल कोशिश पनि गरे ।

दक्षिणी युक्रेनमा द्वन्द्व चलिरहँदा खेर्सन क्षेत्रलाई रुसमा मिसाउने प्रक्रिया अघि बढाइएको छ । रुसी सैनिकहरूको नियन्त्रणमा रहेको खेर्सनमा रुसी मुद्रा रुबल र युक्रेनी मुद्रा हृव्निया दुवै चल्न थालेको छ ।

यसैबीच अमेरिकाका रक्षामन्त्री लोयड अस्टिनले युक्रेनलाई थप सैन्य आपूर्तिको घोषणा गरेका छन् । डेनमार्कले हारपून एन्टी शिप क्षेप्यास्त्र दिनेछ भने चेक गणतन्त्रले किएभलाई ट्यांक, फायर सपोर्ट हेलिकप्टर र क्षेप्यास्त्र प्रणाली उपलब्ध गराइसकेको छ ।

युरोपेली संघका कूटनीतिक प्रमुख जोसेप बोरेलले संघको जगेडा हतियार सबै सकिएको र सदस्य मुलुकहरूको सुरक्षा नै खतरामा परेको बताएका छन् ।

यो खबर पढेर तपाईलाई कस्तो महसुस भयो ?🤔

Leave a Reply

Your email address will not be published. Required fields are marked *

सम्बन्धित समाचार

खोजि गर्नुहोस ...