प्रहरीले गाँजा र अफिम नष्ट गर्ने नाममा सवारी साधनको टायर बालेको छ । मानव स्वास्थ्यमा प्रतिकूल असर पर्ने त्यस्तो टायर बालेर मकवानपुरमा प्रहरीले लागुपदार्थ नष्ट गरेको हो ।
मकवानपुर प्रहरीले विभिन्न समयमा बरामद गरिएका गाँजा र अफिम जलाएर नष्ट गरेको छ । प्रहरीले बरामद ६ सय ३७ किलो गाँजा र पाँच किलो अफिम जलाएर नष्ट गरिएको जनाएको छ ।
इलाका प्रहरी कार्यालय मनहरीले स्थानीय मनहरी खोला किनारमा उक्त गाँजा र अफिम जलाएको हो । गाँजाखेती निरुत्साहित गर्ने कार्य अघि बढेसँगै प्रहरीले गाँजा ओसारपसारमा कडाइ गर्दै राजमार्ग र ग्रामीण क्षेत्रबाट गाँजा बरामद गर्ने क्रमलाई तीब्रता दिएको इलाका प्रहरी कार्यालय मनहरीका प्रहरी निरीक्षक प्रकाश थापाले बताए ।
प्रहरीले पछिल्लो समय कैलाश गाउँपालिका ७ स्थित एकै स्थानबाट पाँच किलो अफिम समेत बरामद गरी अनुसन्धान प्रक्रियालाई जारी राखेको छ । उक्त घटनामा एक जनालाई काठमाडौँ पुगेर पक्राउ गरिएको हो । अन्यको पहिचान गरी खोजी जारी राखिएको पनि प्रहरी निरीक्षक थापाले जानकारी दिए ।
