पोखरा । नेपाली कांग्रेसबाट पोखरा महानगरपालिका प्रमखमा बागी उम्मेदवारी दिएकामध्ये दुई जनाले उम्मेदवारी फिर्ता लिएका छन् । अर्का एक जनाले भने उम्मेदवारी कायमै राखेका छन् ।
आगामी स्थानीय तह निर्वाचनका लागि गत वैशाख १२ मा मनोनयन दर्ता गराएका ऋषिराम सापकोटा र नन्दप्रसाद तिवारीले शुक्रबार उम्मेदवारी फिर्ता लिएका हुन् ।
गठबन्धनबाट प्रमुखमा नेकपा (एकीकृत समाजवादी) तर्फबाट मनोनयन दिएका धनराज आचार्यप्रति असन्तुष्ट रहँदै सापकोटा र तिवारीले बागी उम्मेदवारी दिएका थिए ।
उम्मेदवारी फिर्ता लिएका सापकोटाले एउटै पार्टीबाट ३ जना उम्मेदवार लड्दा सन्देश राम्रो नजाने भएकोले फिर्ता लिएको प्रतिक्रिया दिए ।
तिवारीले पाँचदलीय गठबन्धनले नै अब प्रजातन्त्र जोगाउन र मुलुकको निर्माणका लागि उम्मेदवारी फिर्ता लिएर सघाएको बताए । काँग्रेसबाटै विमल कार्कीको पनि पोखराको मेयरमा उम्मेदवारी परेकामा उनले तोकिएको समयभित्रमा उम्मेदवारी फिर्ता लिएनन् ।
केन्द्रीय गठबन्धनबमोजिम गण्डकी प्रदेशमा समेत गठबन्धनका शीर्षनेताले आफ्ना बागी उम्मेदवारको मनोनयन फिर्ता दिनुपर्ने निर्देशन जारी गरेको थियो ।
