विराटनगर : ट्याक्टरको ठक्करबाट मोरङको पथरीशनिश्चरेमा शुक्रबार राति एक जनाको मृत्यु भएको छ ।
पथरीशनिश्चरे–३ आइतबारेस्थित भित्री सडकखण्डमा उत्तरबाट दक्षिणतर्फ जाँदै गरेको को २ त २८३२ नम्बरको ट्याक्टरले राति ९ बजेतिर ठक्कर दिँदा मोरङको रतुवामाई नगरपालिका–२ इटहराका ४२ वर्षीय दिनेश भण्डारीको मृत्यु भएको हो ।
इलाका प्रहरी कार्यालय पथरीका डीएसपी बेदप्रसाद गौतमका अनुसार दुर्घटनामा परेर गम्भीर घाइते भएका भण्डारीको उर्लाबारीको मंगलबारेस्थित मदन भण्डारी अस्पताल अस्पताल एण्ड ट्रमा सेन्टरमा उपचारको क्रममा मृत्यु भएको हो ।
सडक पार गर्दै गरेको अवस्थामा भण्डारीलाई ट्याक्टरले ठक्कर दिएको हो । ट्याक्टर र चालक पथरीशनिश्चरे–२ का २३ वर्षीय अमृत लिम्बूलाई नियन्त्रणमा लिएर घटनाको अनुसन्धान थालिएको डीएसपी गौतमले बताए । उनका अनुसार लिम्बूको साथमा सवारी चालक अनुमति पत्र (लाइसेन्स) फेला परेन ।
